372               TESTAMENTS ENREGISTRÉS AU PARLEMENT DE PARIS            (612)
tenus les chapellains qui les dictes messes diront de faire sonner chascune messe au matin par deux foiz avant qu'ilz la com­mencent.
Item, il laissa deux escus ou plus, s'il le convenoit, pour convertir en ung petit tableau que l'en mettra à Barbeel emprès l'autel ou cha­pelle où il a fondé deux messes, en faisant memoire de la dicte fonda-cion en briefves paroles, et aux religieux du dit lieu laissa quatre frans, c'est assavoir, les deux pour l'eglise et les autres deux frans pour pitance le jour qu'ilz feront son obit et service pour la premiere foiz après sa mort, si comme ilz y sont tenus et l'ont promis de faire.
Item, volt et veult que, pour ses clers, variés et chamberieres qui le serviront au jour de son trespas et l'auront servi demi an par avant, soit acheté et baillé à chascun des hommes trois aulnes et demie de brunette souffisamment selon l'estat d'un chascun, et à Gauchier, son frere, autant, et aux femmes deux et demie ou trois pour eulx vestir.
Item, il laissa à maistre Jaques Phelippe qui longuement l'a servi et demouré avecques lui, afin qu'il prie pour lui, son Decret et tout l'argent qu'il lui doit, dont chascun d'eulx a cédule, et le requiert d'un anuel dire ou faire dire pour lui dedens deux ans après sa mort ou plus tost, s'ilpuet; à Jehan Ragueneau, son varlet, laissa six frans el une de ses houppellandes ou manteaulx, sans fourreure.
Item, il laissa à chascun de ses clers, variés et chamberieres qui le serviront au jour de son trespas et y auront demouré demi an par avant, lesquelx n'auront laiz en especial, deux frans, et autres deux frans oultre à Jehannette, la chamberiere qui le sert à present, se elle demeure avecques lui au temps de sa mort, et à Guibert le Normant, son premier clerc, quarante frans, et son livre de Manipulus florum, avecques son gros papier de Prothocolles.
Item, quicta et quicte Poncelet Garin, qui l'a servi, de tout ce qui lui doit de la ferme de Baubigny et autrement, et aussi qu'il ne lui puisse riens demander à cause de services ne autrement, car il a esté de tout bien paié.